எஸ்.பி.பி.சரண், பிரேம்ஜி, சிவா, வைபவ், பிரகாஷ் ராஜ், ஜெயராம், நிகிதா, வேகா

பிரவீன்-ஸ்ரீகாந்த்

விதேஷ்

சக்தி சரவணன்

செல்வா

கல்யாண் & சரவண ராஜன்

வாலி, கங்கை அமரன், யுவன் சங்கர் ராஜா

யுவன் ஷங்கர் ராஜா

வெங்கட் பிரபு

டி.சிவா

     டிவி நடிகர் அஜய்குமார் (சிவா), படுஜாலி பேர்வழி கணேஷ் (பிரேம்ஜி), இரண்டு தெலுங்கு சகோதரர்கள் ஜகபதிபாபு (எஸ்பிபி சரண்), ராம்பாபு (வைபவ்) ஆகிய நால்வரும் நெருங்கிய நண்பர்கள். ஐதராபாத்தில் நடக்கும் கிரிக்கெட் மாட்ச் பார்க்க சென்னையிலிருந்து ஒரு ஓட்டை கேரவனில் கிளம்புகிறார்கள்.

     அதேநேரம் ஹைதராபாத்தைச் சேர்ந்த தொழிலதிபர் விஸ்வநாத்துக்கு (பிரகாஷ் ராஜ்) ஒரு பிரச்சனை. அவரது மகள் சரோஜா (வேகா) கடத்தப்படுகிறார். சரோஜாவை விடுவிக்க கடத்தல்காரன் பத்து கோடி கேட்கிறான். விஸ்வநாத் தனது போலீஸ் நண்பர் ரவிச்சந்திரனின் (ஜெயராம்) உதவியை நாடுகிறார்.

     இதனிடையே நான்கு நண்பர்கள் ஹைதராபாத் செல்லும் வழியில் ஒரு மிகப் பெரிய விபத்து காரணமாக டிராபிக் ஜாம் ஆகவே மாற்று வழியில் புறப்படுகிறார்கள். அங்கு இவர்களது வேனுக்கு இடையில் வந்துவிழுகிறார் போஸ் வெங்கட். குண்டு காயத்துடன் இருக்கும் அவரைக் காப்பாற்ற நண்பர்கள் முயற்சிக்கிறார்கள்.

     அப்போது அங்கு வரும் வில்லன் சம்பத், போஸை கொல்கிறார். இதை மறைந்திருந்து பார்க்கும் நண்பர்கள் அதிர்ச்சி அடைகிறார்கள். அங்கிருந்து உயிர் தப்பினால் போதும் என கிளம்புகிறார்கள். அப்போது சரண், தனது பர்ஸை வில்லன்கள் இடத்தில் தவற விட்டதை அறிந்து அதிர்கிறார்.

     பர்ஸை எடுக்க திரும்ப அதே இடத்துக்கு நண்பர்கள் கிளம்புகிறார்கள். அப்போதுதான் அங்கு வேகாவை கடத்தி வைத்திருப்பது தெரிகிறது. வேகாவையும் காப்பாற்றிக் கொண்டு செல்ல தயாராகிறார்கள். அவர்கள் தப்பித்தார்களா? வில்லன் கும்பலை ஜெயராம் பிடித்தாரா? என்பதைச் சொல்கிறது 'சரோஜா' படத்தின் இறுதிக் காட்சி.

     பிசினஸ்தான் முக்கியம் என அலையும் பிரகாஷ் ராஜுக்குள் இருக்கும் தந்தை, குடும்பத்தை நினைத்து கலங்கும் சரண், நண்பனை இழந்துவிடுவோமோ என தவித்து போகும் ஷிவா, உயிரை கையில் பிடித்து ஓடிக்கொண்டிருக்கும்போதும் கலாய்த்துக் கொண்டிருக்கும் பிரேம்ஜி என படத்தை ஒவ்வொருவரும் தூக்கி நிறுத்துகிறார்கள்.

     சரண் சிறிய ஓட்டைக்குள் மாட்டிக்கொண்டு மரண பயணத்தை வெளிப்படுத்தும் இடம் அருமை. பிரேம்ஜி அமரன் வருகிற ஒவ்வொரு காட்சியிலும் சிரிப்பு அலையலையாய் பரவுகிறது. எந்த பெண்ணை பிரேம்ஜி பார்த்தாலும் தேவதைகள் சூழ்ந்துகொண்டு டான்ஸ் ஆடுவது, வேகா வைபவ்வின் கையை பிடிக்கும்போது பிரேம்ஜியின் பின்னணியில் ஒலிக்கும் சோகப் பாட்டு போன்ற காட்சிகள் இதமானவை. பேக்டரிக்குள்ளேயே கதை ரொம்ப நேரம் சுற்றிக் கொண்டிருப்பதை தவிர்த்திருக்கலாம்.

     பிரகாஷ் ராஜ், போலீஸ் ஜெயராம் இருவரும் பாத்திரம் அறிந்து நடித்துள்ளனர். நிகிதா கவர்ச்சியில் கிறங்கடிக்கிறார். சரோஜாவாக வரும் வேகா நல்ல அறிமுகம்.

     யுவன் ஷங்கர் ராஜாவின் இசையில் பாடல்களும் பின்னணி இசையும் படத்துக்கு பெரிய பலம். 'தோஸ்து படா தோஸ்து', 'கோடானு கோடி' பாடல்கள் அருமை. ஷக்தி சரவணின் ஒளிப்பதிவும் பிரவீன்-ஸ்ரீகாந்த்தின் எடிட்டிங்கும் படத்திற்கு பலம்.

     பேபெல் (Babal) படத்தின் இன்ஸ்பிரேஷனில் சரோஜா திரைக்கதையை அமைத்திருக்கிறார் வெங்கட்பிரபு. ஒருநாள் சம்பவமே படம். அழுத்தமான கதை இல்லாவிட்டாலும், ஒரு சின்ன முடிச்சை வைத்துக் கொண்டு, கலகல விறுவிறு சம்பவங்களுடன் படத்தை நகர்த்திச் சபாஷ் பெறுகிறார் இயக்குநர் வெங்கட் பிரபு.

---

---

இணைய பக்க முகவரி: http://www.tamilthiraiulagam.com/films/2008/saroja.html

---