அஜித், நயன்தாரா, நவ்தீப், சுஹாசினி, ஜெயராம், சுமன், நாசர், பாஸ்கர்

அர்ஜுன்

யுவன் சங்கர் ராஜா

ராஜு சுந்தரம்

ஐயங்கரன் இண்டர்நேஷனல்

     ஹிந்தியில் ஷாருக்கான் நடித்து வெளிவந்த 'மே ஹூன் நா' என்ற படத்தை தமிழில் கொடுத்திருக்கிறார் இயக்குனர் ராஜு சுந்தரம்.

     'ஏகன்' என்றால் சிவபெருமான். 'ஏகன்' என்றால் ஒற்றை ஆள். சிவனைப் போல ஒற்றை ஆளாக நின்று, சத்ருக்களை சம்ஹாரம் செய்யும் வேடத்தில் அஜீத். திறமை வாய்ந்த போலீஸ் அதிகாரியாக வருகிறார் அஜீத். ஹாங்காங்கில் ஒரு பெரிய தாதாவிற்கு முடிவு கட்டும் அஜித் பின்னர் இந்தியா வருகிறார்.

     இந்தியாவில் வில்லன் சுமனிடம் கூட்டாளியாக இருக்கும் தேவன் ஒரு கட்டத்தில் அவரிடமிருந்து விலகி அப்ரூவராக மாற முடிவெடுக்கிறார். இதையறிந்த சுமன் தேவனை கொலை செய்ய முயல்கிறார். சுமனிடமிருந்து தப்ப தலைமறைவாகிறார். ஒரு புறம் சுமனும் மறுபுறம் போலீஸும் தேவனை துரத்துகிறார்கள்.

     இதற்கிடையே தேவனின் மகள் பியா ஊட்டியில் ஒரு கல்லூரியில் படிப்பது போலீஸுக்கு தெரிய வருகிறது. போலீஸ் தேவனைப் பற்றி அறிந்து கொள்ள பியாவுடன் நெருங்கிப் பழக அஜீத்தை அனுப்புகிறது. கல்லூரியில் மாணவராக நுழைகிறார் அஜீத். அவ்வப்போது எதிரிகளிடமிருந்து பியாவைக் காப்பாற்றுகிறார்.

     கல்லூரி ஆசிரியராக நயன்தாரா. அஜித்க்கு நயன் தாரா மேல் காதல் வருகிறது. அதே போல் நவ்தீப்பும் பியாவும் காதலிக்கிறார்கள். கதையில் திடீர் திருப்பமாக நவ்தீப் அஜித்தின் சகோதரன் என்ற உண்மை தெரிகிறது. வளர்ப்பு அம்மா, தம்பி, அப்பா என்று செண்டிமெண்ட் குழப்பம், தம்பி நவ்தீப், பியாவின் காதல் என்று அவர்களும் குழம்பி நம்மையும் குழப்புகிறார்கள்.

     இறுதியில் அஜித் தேவனைக் கண்டுபிடித்து வில்லன் சுமனை என்ன செய்கிறார் என்பதே கதை.

     அஜித் தனக்கு காமெடி நன்றாக வரும் என்பதை மீண்டும் ஒரு முறை நிரூபித்திருக்கிறார். ராஜு சுந்தரம் உபயத்தில் நடனத்திலும் புது அவதாரம் எடுத்துள்ளார் அஜித். சண்டைக்காட்சிகளில் வழக்கம் போல் சுறுசுறுப்பு காட்டியுள்ளார்.

     நயன் தாரா பில்லாவைத் தொடர்ந்து இந்தப் படத்தில் கவர்ச்சி காட்டியுள்ளார். நடிப்பு அவசியமில்லாத பாத்திரம் என்பதால் கவர்ச்சி மட்டும் காட்டினால் போதும் என்று திருப்தியடைந்து விட்டார் போலிருக்கிறது.

     நாசர், சுஹாசினி, ஹனிபா ஆகியோர் தமது பாத்திரத்தை திறம்பட நடித்துள்ளார்கள். சுமன் பாத்திரத்தை வீணடித்திருக்கிறார்கள்.

     கல்லூ‌ரி முதல்வர் ஜெயராமும் சத்யனும் சேர்ந்து நடத்தும் நகைச்சுவைக் காட்சிகள் அருமை. அவர்களுடன் அஜித்தும் ஜுனியர் ஹனிஃபாவும் சேர்ந்து மேலும் சிரிக்க வைக்கிறார்கள்.

     யுவன் சங்கர் ராஜாவின் இசையில் ஒரு சில பாடல்கள் அருமை. பின்னணி இசை அருமை என்று சொல்வதற்கில்லை. அர்ஜுனின் ஒளிப்பதிவு மனதைத் தொடுகிறது.

     ராஜு சுந்தரத்துக்கு இது இயக்குனராக முதல் படம். படத்தை ஒரளவுக்கு விறுவிறுப்பாக கொண்டு சென்றிருந்தாலும், பாத்திரப் படைப்பில் கோட்டை விட்டுள்ளார் என்றே கூற வேண்டும். இருந்தாலும், படத்தை அஜீத்தின் நடிப்பும், நகைச்சுவைக் காட்சிகளும் தூக்கி நிறுத்துகின்றன.

---

---

இணைய பக்க முகவரி: http://www.tamilthiraiulagam.com/films/2008/aegan.html

---

பதிப்புரிமை © 2007 தமிழ்திரைஉலகம்.காம்.
அனைத்து உரிமைகளும் பாதுகாக்கப்பட்டவை.
இந்த வலைதள பக்கத்தில் உள்ள தகவல்களை பதிப்பிக்கவோ,
ஒலிபரப்பவோ, வெளியிடவோ அல்லது விநியோகிக்கவோ கூடாது.

---