அர்ஜுன், நிலா, வடிவேலு, நாசர், ரகுவரன், லால், போஸ் வெங்கட்

வைத்யா, வி.கே. செந்தில்குமார்

ராஜு சுந்தரம்

டி. இமான்

சுராஜ்

ஆஸ்கார் பிலிம்ஸ் வி.ரவிச்சந்திரன்

     பாப்பாப்பட்டி கீரிப்பட்டி பிரச்சினையை எடுத்துக் கொண்டு சினிமா முலாம் பூசியிருக்கிறார்கள். லால் ஒரு ரவுடி. அரசியல் செல்வாக்கும் அராஜக பலமும் கொண்டவர். நாச்சியார்புரம் தனித்தொகுதியாக அறிவிக்கப்பட்டதும் அங்கு பதினாறு ஆண்டாக தேர்தல் நடத்தவிடாமல் தடுக்கிறார். அதையும் மீறி தேர்தல் அதிகாரி ரகுவரன் தேர்தலை நடத்த முயற்சிக்க, வெடிக்கிறது பிரச்சனை.

     தேர்தல் ஆணைய அதிகாரி எண்ணப்படி தேர்தல் நடக்கிறது. ஆனால் வாக்களிக்க யாரும் வராத நிலை. காரணம் வாக்காளர்களை அடித்து துவம்சம் செய்கிறார் லால். இந்த அநியாயத்தைக் கேட்க ஆளே இல்லையா என்று பதறுகிறது ஊர். இதை எதிர்த்துக் கேட்ட அர்ஜுனின் தந்தை நாசரை லால் தாக்குகிறார். தன் தந்தையின் மேல் கை வைத்ததால் அர்ஜுனுக்குள் பதுங்கியிருந்த புலி சீறி வெளியே வருகிறது. லாலை அடித்து நொறுக்கி சிறையில் தள்ளுகிறார். அர்ஜுனை பழிவாங்க லாலும் திட்டம் போடுகிறார். ரவுடியிசமா... நேர்மையான போலீசா... எது ஜெயிக்கிறது என்பதுதான் கதை முடிவு.

     இதுவரை உயர் போலீஸ் அதிகாரியாக நடித்து வந்த அர்ஜுன் இதில் சாதாரண கான்ஸ்டபிள் என்பது வித்தியாசம். முற்பாதியில் வடிவேலுவுடன் ஜோடி சேர்ந்து அர்ஜூனும் ரொம்பவே கலகலப்பூட்டுகிறார். பிற்பாதியில் சீரியசாகி விடுகிறார். கடைக்காரர்களை மிரட்டி, பிச்சைக்காரனுடன் போட்டி போட்டு மாமூல் வாங்குவது, ரயில்வே தண்டவாளத்தில் பிணத்துக்கு காவல் இருக்கும்போது, பேயை கண்டு அலறுவது என்று காமெடியில் கலக்குகிறார் வடிவேலு.

     நேர்மையான தேர்தல் அதிகாரி ரகுவரன், அநியாயத்தை தட்டி கேட்டு உயிரை விடும் நாசர் ஆகியோர் மனதில் நிற்கிறார்கள்.

     போஸ் வெங்கட், தண்டபாணி, சண்முகராஜன் என்று வில்லன்களும் தங்கள் பங்கை சரிவர செய்திருக்கிறார்கள்.

     டி.இமானின் இசையில் பாடல்கள் சுமார் ரகம்.

     வழக்கமான பழிவாங்கும் கதைதான் என்றாலும் பிரம்மாண்டமும் விறுவிறுப்பும் காட்டி மிரட்டியிருக்கிறார் சுராஜ்.

---

---

இணைய பக்க முகவரி: http://www.tamilthiraiulagam.com/films/2007/maruthamalai.html

---

© 2007 தமிழ்திரைஉலகம்.காம்  பொறுப்பாகாமை அறிவிப்பு | ரகசிய காப்பு கொள்கை | உங்கள் கருத்துக்கள்