விஜய், ஷ்ரேயா, நமீதா, ஆசிஷ் வித்யார்த்தி, சந்தானம், ஸ்ரீமன்

பாலசுப்ரமணியம்

ஏ.ஆர். ரஹ்மான்

பரதன்

ஸ்வர்கசித்ரா அப்பச்சன்

     விஜய் முதல் முறையாக 2 வேடங்களில் நடித்துள்ள வித்தியாசமான படம் அழகிய தமிழ் மகன். படு ஸ்மார்ட் ஆகத் தோன்றும் விஜய், ரசிகர்களுக்கு குஷியூட்டுகிறார். படம் முழுக்க அவர் செய்யும் காமெடியும், ஸ்டைல்களும் ரசிகர்களுக்கு சூப்பர் விருந்தாக அமைந்துள்ளது. விஜய்யின் திறமை, பலம், செல்வாக்கு ஆகியவற்றை அறிந்து அதற்கேற்ப கதையை கொண்டு சென்றுள்ளார் அறிமுக இயக்குநர் பரதன்.

     படத்தில் விஜய் ஹீரோ மட்டுமல்ல வில்லனும் அவர்தான். பிசினஸ் மேனேஜ்மென்ட் படிக்கும் விஜய் (குரு) ஒரு தடகள வீரர். நடிகையாகவே இப்படத்தில் வரும் ஷகீலாவின் வீட்டில் நண்பர்கள் சந்தானம், சத்யனுடன் குடியிருக்கிறார் குரு. பெரும் பிசினஸ் புள்ளியான ஆசிஷ் வித்யார்த்தியின் மகள் அபினயாவும் (ஷ்ரேயா), குருவும் தற்செயலாக சந்திக்கின்றனர். காதலில் விழுகின்றனர். இந்தக் காதலை இருவரது குடும்பமும் எதிர்ப்பு இல்லாமல் ஏற்றுக் கொள்கின்றனர். இந்த நிலையில் குருவுக்குள் ஒரு புதிய மாற்றம் ஏற்பட்டு வருங்காலத்தில் நடக்கப் போவதை முன் கூட்டியே அறியும் சக்தி கிடைக்கிறது. டாக்டர்கள் இதனை ஈ.எஸ்.பி. சக்தி என்கின்றனர். குருவுக்கும், அபினயாவுக்கும் திருமணம் நிச்சயமாகிறது. ஈஎஸ்பி சக்தி ஏற்படுத்தும் குழப்பத்தால், நிச்சயதார்த்தத்திற்கு முன்பு அபினயாவைப் பிரிந்து மும்பைக்குப் போகிறார் குரு. அங்கு தன்னைப் போலவே இருக்கும் பிரசாத்தை (வில்லன் விஜய்) பார்க்கிறார். அவரை சந்திக்கும் முன்பு விபத்தில் சிக்கி காயமடைகிறார். படு ஜாலியான, கவலை இல்லாத மனிதனான பிரசாத், பணத்துக்காக எதையும் செய்யக் கூடிய குணமுடையவர். சென்னைக்கு வரும் பிரசாத்தைப் பார்ப்போர் குரு என்று நினைத்து விடுகின்றனர். அபினயாவும் அவரைக் குரு என்று நினைத்து தனது வீட்டுக்குக் கூட்டி வருகிறார். ஷ்ரேயாவின் பணச் செழிப்பைப் பார்க்கும் பிரசாத், அதை அபகரிக்க, அவரைத் திருமணம் செய்ய முடிவெடுக்கிறார். இந்த நிலையில் குரு சென்னைக்குப் பறந்து வருகிறார். அதன் பிறகு என்ன நடக்கிறது என்பது படத்தின் மீதிக் கதை.

     டான்ஸ், காமெடி ஆகியவற்றில் வெளுத்துக் கட்டியுள்ளார் விஜய். டைட்டில் பாடலில் நடனம் அருமை. வில்லன் வேடத்திலும் விஜய் வித்தியாசம் காட்டியுள்ளார். படத்தின் பெரும் பலமே விஜய்தான். வித்தியாசமான கேரக்டரில் வருகிறார் ஷ்ரேயா. கவர்ச்சியோடு நடிக்கவும் செய்துள்ளார். கிளைமாக்ஸ் காட்சியில் நன்றாக நடித்துள்ளார். நமீதா வழக்கம் போல் கவர்ச்சி காட்டுகிறார். சந்தானத்தின் காமெடி படு ஜோர். மதுரைக்கு போகாதடி பாடல் சூப்பர் ஹிட். ரீமிக்ஸ் ஆக இடம் பெற்றுள்ள சிவாஜியின் சூப்பர் ஹிட்டான பொன்மகள் வந்தால் பாடல் ரசிக்கும்படி உள்ளது.

     படத்தின் நீளமும் ஒரு பின்னடைவாக இருக்கிறது. கிட்டத்தட்ட 3 மணி நேரம் படம் ஓடுகிறது. படத்தின் கிளைமாக்ஸை ரசிகர்கள் ஏற்றுக் கொள்ளவில்லை என்பது தெளிவு. விஜய் தனது நடிப்பால் அனைத்துக் குழப்பங்களையும் சமாளித்து விடுகிறார் என்றே சொல்லவேண்டும்.

---

---

இணைய பக்க முகவரி: http://www.tamilthiraiulagam.com/films/2007/azhagiyathamizhmagan.html

---

© 2007 தமிழ்திரைஉலகம்.காம்  பொறுப்பாகாமை அறிவிப்பு | ரகசிய காப்பு கொள்கை | உங்கள் கருத்துக்கள்