ரமேஷ், பூஜா, சரத்குமார், கலாபவன் மணி, லிவிங்ஸ்டன், நளினி, எஸ்.வி.சேகர்

ராம்கோபால் வர்மா

ரமேஷ்பாபு

ஸ்ரீகாந்த் தேவா

வின்சென்ட் செல்வா

ராதிகா சரத்குமார்

ராடான் மீடியாவொர்க்ஸ் (இந்தியா) லிமிடெட்

     சாமர்த்தியமும் அதிர்ஷ்டமும் துளிக்கூட இல்லாதவராக ரமேஷ். அவரின் அம்மாவாக அடங்காப்பிடாரி பாத்திரத்தில் நளினி. ரமேஷ் செய்யும் செயல்களுக்காக அவரை அடிஅடியென விளாசுகிறார். அதை தடுக்கும் பூஜாவின் மீது ரமேஷுக்கு சிறு வயது முதலே காதல். இடையில் வரும் பணக்கார இளைஞன் முகேஷ் பூஜாவின் காதலனாகிறார். ஒரு நாள் பூஜாவை ரெஸ்டாரண்டில் பார்த்து ரமேஷ் அவருக்கு எதிரில் அமர்ந்து அவளையே பார்த்துக் கொண்டிருக்கிறார். அச்சமயம் அங்கு வரும் முகேஷ் அதைக் கண்டு ரமேஷை அடிக்க, பூஜாவும் அவரை பைத்தியக்காரன் என்று சொல்ல, மிகவும் உடைந்து போகிறார் ரமேஷ். கடற்கரையில் மனமுடைந்து அழுதுகொண்டிருக்கும்போது அவர் கையில் சிலை ஒன்று கிடைக்க, அந்த சிலையிடம் தன் மனக்குமுறலை வெளிப்படுத்தும் போது யார் கண்ணிலும் படாமல் தொலைந்து போனாலும் பரவாயில்லை என்று கூறுகிறார். சிலை அருளால் அப்படியே யார் கண்ணிலும் படாமல் மாயமாக மறைகிறார்.

     தன் சக்தியை தெரிந்து கொண்டு அதைக்கொண்டு தன்னை இகழ்ந்தவர்களையெல்லாம் ஒருவழி பண்ணுகிறார் ரமேஷ். ஆனால் ஒரு கட்டத்தில் பூஜாவின் காதலைப் பெற பணம் இருந்தால் தான் முடியும் என தவறாக முடிவு செய்கிறார். அதற்காக ஒரு வங்கிக் கொள்ளையில் ஈடுபடுகிறார். வங்கிக் கொள்ளையை துப்புத் துலக்க காவல்துறை அதிகாரிகளாக சரத்குமாரும், கலாபவன் மணியும் வருகிறார்கள். அப்போது ரமேஷின் அதிசய மறையும் சக்தி பற்றி அறிகிறார் சரத்குமார். இதனிடையே பூஜாவும் முகேஷும் திருமணம் செய்ய முடிவு செய்கிறார்கள். இதையறிந்து வெகுண்டு எழுகிறார் ரமேஷ். பூஜாவை அடைவதற்காக தன் மறையும் சக்தி கொண்டு ஊரையே திகிலூட்டுகிறார். ரமேஷின் முயற்சிகளை முறியடித்து பூஜாவும் ரமேஷும் திருமணம் செய்து கொண்டார்களா? ரமேஷ் நிலைமை என்ன ஆயிற்று ? எனபது தான் கதை.

     இது ரமேஷின் முதல் படம். தனக்கு கிடைத்த பாத்திரத்தை உணர்ந்து முடிந்தவரை நடித்துள்ளார். அழகு பொம்மையாக வரும் பூஜா சில இடங்களில் நடிக்கவும் செய்திருக்கிறார். அடங்காப்பிடாரி மனைவியாக நளினி சிறப்பாக செய்திருக்கிறார். மனைவிக்கு அடங்கி இருக்கும் பாத்திரத்தில் லிவிங்ஸ்டன் நடிப்பு அருமை. பூஜாவின் அப்பாவாக வரும் எஸ்.வி.சேகர் நகைச்சுவையில் அதிகம் கலக்கவில்லை. பூஜாவின் காதலனாக வரும் முகேஷ் நடிப்பு சுமார் தான். காவல்துறை அதிகாரியாக கௌரவத் தோற்றத்தில் வரும் சரத்குமார் கலக்கி இருக்கிறார். இவருடன் பணிபுரியும் அதிகாரியான கலாபவன் மணி வழக்கம் போல் மிமிக்ரி செய்கிறார்.

     காயப் இந்தி படத்தின் மறுஆக்கம் (ரீமேக்) தான் ஜித்தன். ஸ்ரீகாந்த் தேவாவின் இசையில் பாடல்கள் அருமை. ரமேஷ்பாபுவின் கிராபிக்ஸ் காட்சிகளும் ஒளிப்பதிவும் கண்ணுக்கு குளிர்ச்சி. ராம்கோபால் வர்மாவின் மூலக்கதையைக் கொண்டு தமிழுக்கு ஏற்றவாறு உருவாக்கி இருக்கிறார் இயக்குனர் வின்சென்ட் செல்வா. வித்யாசமான கதையை படமாக்கியதற்கு அவரை பாராட்ட வேண்டும்.

---

---

இணைய பக்க முகவரி: http://www.tamilthiraiulagam.com/films/2005/githan.html

---

© 2007 தமிழ்திரைஉலகம்.காம்  பொறுப்பாகாமை அறிவிப்பு | ரகசிய காப்பு கொள்கை | உங்கள் கருத்துக்கள்