"சக்சஸ், இன்று முதல் நானும் ஒரு ஏமாற்றுக்காரன்" என்ற வசனத்தின் மூலம் சிவாஜி கணேசனின் நடிப்பு சகாப்தம் ஆரம்பமானது. இந்த படம் இவருக்கு முதல் படம் என்று சொன்னால் யாரும் நம்ப மட்டார்கள். முதல் படத்திலேயே நடிகர் திலகம் சிவாஜி கணேசன் செஞ்சுரி அடித்திருந்தார். இந்த படத்தில் சிவாஜிக்குப் பதிலாக நடிப்பிசை புலவர் கே.ஆர்.ராமசாமியைத் தான் போட வேண்டும் ஏ.வி.எம். மெய்யப்ப செட்டியார் விரும்பினாராம். ஆனால் நேஷனல் பிக்சர்ஸ் பெருமாள் முதலியார் தான் பிடிவாதமாக சிவாஜி தான் நடிக்க வேண்டும் என்று வற்புறுத்தினாராம். பெருமாள் முதலியார் தீவிர அண்ணா விசுவாசி. சிவாஜி அண்ணாதுரையின் சிபாரிசு. கடைசியில் வேறு வழியில்லாமல் ஒப்புக் கொண்டாராம் ஏ.வி.எம் மெய்யப்ப செட்டியார். அதே போல் சிவாஜிக்கு தாய் போல் இருந்து பலவகையிலும் உதவி செய்தவர் பெருமாள் முதலியார் மனைவி சாந்தாம்மாள். அதனால் தான் சிவாஜி தன் மூத்த பெண்ணிற்கு சாந்தி என்று பெயர் வைத்தாராம், நன்றி மறவாமல். அதோடு ஒவ்வொரு பொங்கலுக்கும் புத்தாடைகளுடன் தவறாமல் பெருமாள் முதலியாரைச் சென்று சந்தித்து ஆசி பெற்று வருவாராம் நடிகர் திலகம்.

     சுதர்சனம் இசையில் பாடல்கள் அனைத்தும் அருமை. 'போறவரே' பாடலில் எம்.எஸ்.ராஜேஸ்வரியின் குரல் பண்டரிபாய்க்கு நன்றாக பொருந்தியிருக்கும். உடுமலை நாராயண கவி எழுதிய 'தேசம் ஞானம் கல்வி' பாடல், 'கா கா கா' பாடல் மற்றும் பாரதியாரின் 'நெஞ்சு பொறுக்குதில்லையே' பாடலைப் பாடியுள்ளவர் சி.எஸ்.ஜெயராமன். இதை தவிர 'என் வாழ்விலே ஒளி ஏற்றும்', 'பூ மாலையை புழுதியிலே', 'பொருளே இல்லார்க்கு', 'திராவிட நாடு வாழ்கவே', 'கொஞ்சும் மொழி சொல்லும்', 'பேசியது நானில்லை' என்ற பாட்டுகளும் உள்ளன.

     தமிழின் மிகச் சிறந்த படங்களுள் ஒன்றாக பராசக்தி என்றும் நிலைத்து நிற்கும்.

---

---

---

இணைய பக்க முகவரி: http://www.tamilthiraiulagam.com/films/1952/parasakthi2.html

---