பார் போற்றும் பைந்தமிழ் நடிகர் செவாலியர் நடிகர் திலகம் சிவாஜி கணேசன் அவர்கள் 1927ம் வருடம் அக்டோபர் மாதம் 1ஆம் நாள் சின்னையா மன்றாயர் - ராஜாமணி அம்மாள் ஆகியோருக்கு மகனாக சீர்காழியில் பிறந்தார். இவரது இயற்பெயர் சின்னையாப்பிள்ளை கணேசன் ஆகும்.

     சிவாஜி கணேசன் திரையுலகில் அறிமுகமாகும் முன் மேடை நாடகங்களில் நடித்து வந்தார். அச்சமயம் சிவாஜி கண்ட இந்து ராஜ்யம் என்ற நாடகத்தில் பேரரசர் சிவாஜியாக நடத்தார். அந்நாடகத்தில் அவரது நடிப்புத்திறனைக் கண்ட தந்தைப் பெரியார் அவரை 'சிவாஜி' கணேசன் என்று அழைத்து பாராட்டினார். அன்றிலிருந்து அதுவே அவரது பெயராகிவிட்டது.

     பராசக்தி படம் மூலம் திரையுலகில் அறிமுகமான சிவாஜி கணேசன் 300க்கும் மேற்பட்ட தமிழ் படங்களிலும், 9 தெலுங்குப் படங்களிலும், 2 இந்திப் படங்களிலும், ஒரு மலையாளத் திரைப்படத்திலும் நடித்துள்ளார்.

     இவர் நடித்த மனோகரா, வீரபாண்டிய கட்டபொம்மன் போன்ற திரைப்படங்கள் வசனத்திற்காகப் பெயர் பெற்றவை. கப்பலோட்டிய தமிழன் படத்தில் வ.உ.சிதம்பரம் பிள்ளையாக நடித்து அவரை நம் கண் முன் நிறுத்தியவர். பாசமலர், வசந்தமாளிகை, உயர்ந்த மனிதன், கௌரவம், தில்லானா மோகனாம்பாள், திருவருட்செல்வர், திருவிளையாடல், புதிய பறவை, தியாகம், திரிசூலம் போன்ற படங்கள் இவருக்கு பேரும் புகழும் பெற்றுத் தந்தன.

     ஆரம்ப காலம் முதல் 1955 வரை சிவாஜி கணேசன் திராவிட இயக்கங்களில் ஆர்வம் கொண்டு விளங்கினார். 1961ல் காங்கிரஸ் கட்சியில் இணைந்து செயல்படத் துவங்கினார். 1982ல் நாடாளுமன்ற மேலவை உறுப்பினராக பதவி வகித்தார். 1987ல் காங்கிரஸில் இருந்து பிரிந்து தமிழக முன்னேற்ற முன்னணி என்ற கட்சியை ஆரம்பித்து திருமதி ஜானகி ராமச்சந்திரனின் அதிமுக கட்சியுடன் கூட்டணி வைத்து தேர்தலில் போட்டியிட்டார். இருப்பினும் அவரால் தேர்தலில் வெற்றி பெற முடியவில்லை. பின்னர் படிப்படியாக அரசியலிலிருந்து விலகினார்.

     சிவாஜி கணேசன் அவர்கள் 2001 ஜூலை 21ல் இயற்கை எய்தினார்.


ஆப்பிரிக்க - ஆசியத் திரைப்பட விழா (கெய்ரோ 1960)- சிறந்த நடிகருக்கான விருது
பத்ம ஸ்ரீ விருது (1966)
பத்ம பூஷன் விருது (1984)
செவாலியே விருது (1994)
தாதா சாகேப் பால்கே விருது (1997)

     1962ல் அமெரிக்க நாட்டின் சிறப்பு விருந்தினராக சுற்றுப்பயணம் மேற்கொண்ட போது, நயாகரா மாநகரின் 'ஒரு நாள் நகரத்தந்தையாகக்' கௌரவிக்கப்பட்டார்.

---

---

---

இணைய பக்க முகவரி: http://www.tamilthiraiulagam.com/actors/sivajiganesan.html

---

பதிப்புரிமை © 2007 தமிழ்திரைஉலகம்.காம்.
அனைத்து உரிமைகளும் பாதுகாக்கப்பட்டவை.
இந்த வலைதள பக்கத்தில் உள்ள தகவல்களை பதிப்பிக்கவோ,
ஒலிபரப்பவோ, வெளியிடவோ அல்லது விநியோகிக்கவோ கூடாது.

---